Mata sa Mata

Ipinahayag niya sa pagpikit ang tiwala

sa aking pag-alis dahil sa dikta

ng pareho naming pangangailangan.

Buntong hininga at pagtataka

ang aking pakiramdam, na sana niyakap ko

ang pagtitig ng ilaw sa poste habang umuulan.

Hinihintay ko ang jeep pa-Gulanggulang

Na tila milya-milya ang agwat

mula sa dilim hanggang sa liwanag.

Kasabay ng paghadlang ng luha,

nagluluksa ang langit at sulyap

sa liwanag ng relo ang aking paghihintay.

Urong-sulong: dapat bang lisanin

ang pinili at yakapin ang pagtanaw sa ilaw

habang humahanga sa karimlan?

Magaan akong humakbang paalis

hanggang sa masumpungan ang pares

ng mga titig at hinagpis:

Isang seminaristang tila blangko ang mga mata

Ngunit nagbabaga at nakapapaso

ang pagsilip niyang wari'y gusto kang makilala.

Kabilang sa Kalipunan ng Tula na

Ang Habito at Iba Pang Tula sa Talinghaga ng Mantsa ng Teologia